Home > Work > أحمد فؤاد نجم: الأعمال الشعرية الكاملة

أحمد فؤاد نجم: الأعمال الشعرية الكاملة QUOTES

أحمد فؤاد نجم: الأعمال الشعرية الكاملة QUOTES

1 " مر الكلام زى الحسام
يقطع مكان ما يمر
أما المديح سهل ومريح
يخدع.. لكن بيضر
والكلمة دين من غير ايدين
بس الوفا عالحر. "

― أحمد فؤاد نجم , أحمد فؤاد نجم: الأعمال الشعرية الكاملة

2 " ياويلك بصبرك
عالظالم وظلمه
في الدنيا وياويلك
من يوم الحساب "

― أحمد فؤاد نجم , أحمد فؤاد نجم: الأعمال الشعرية الكاملة

3 " ..وكل يوم في حْبِك تزيد الممنوعات .. وكل يوم بحبِك أكتر من اللي فات "

― أحمد فؤاد نجم , أحمد فؤاد نجم: الأعمال الشعرية الكاملة

4 " أه يا وطن على الورق
الحلم فيك على الورق
والعلم فيك على الورق "

― أحمد فؤاد نجم , أحمد فؤاد نجم: الأعمال الشعرية الكاملة

5 " قل أعوذو

مدّ بوزه

الجبان

إبن الجبانه

كَل غدانا

قام لقانا

شعب طيب

كل عشانا

1968 "

― أحمد فؤاد نجم , أحمد فؤاد نجم: الأعمال الشعرية الكاملة

6 " بكرة لما قمركو يطلع

والشمس تطلع

ونهاركو يطلع

حيقولوا كان في المكان دا ناس

فيهم طيابه

وفيهم حماس

وكانوا آخر الامر

ناس

وكان زمانهم سجون

وكانوا

مابين سجونه وأمريكانه

وبين ضباب الطريق حيارى

ماحد قادر يشوف مكانه

حتقولوا كانوا

وياما كانوا

وياما شربوا

وياما عانوا

وياما جالهم

وياما جيلهم دفع

وكان التمن أمانه

وياما ناس فى المسيره

مشيت

وناس ف نص المسيره خانوا

حتقولوا كانوا

أو ياما كانوا

لكن ح يبقى فى الأمر حاجه

إن اللى عربد

ما سابش حاجه

وساب كلابه

على كل حاجه

تهبش وتنهش

فى كل حاجه

ماقدرش يقتل فى اى حاجه

روح التفاؤل

بكل حاجه
_____________
القاهرة 1973 "

― أحمد فؤاد نجم , أحمد فؤاد نجم: الأعمال الشعرية الكاملة

7 " الحكاية إن البلد مش ملك ناسها
والخلايق في البلد مش مالكة راسها
والبلد يا ولاد بلدنا مش عليلة
البلد علتها جاية من خرسها "

― أحمد فؤاد نجم , أحمد فؤاد نجم: الأعمال الشعرية الكاملة

8 " يا اسكندريه
بحرك عجايب
يا ريت ينوبني م الحب نايب
تحدفني موجه
على صدر موجه
والبحر هوجه
والصيد مطايب
أغسل هدومي
وانشر همومي
على شمس طالعه
وانا فيها دايب "

― أحمد فؤاد نجم , أحمد فؤاد نجم: الأعمال الشعرية الكاملة

9 " لكن يا مصر حييجي اليوم ويطير النوم
وكل ظالم أو مظلوم حيكون له حساب. "

― أحمد فؤاد نجم , أحمد فؤاد نجم: الأعمال الشعرية الكاملة

10 " يا شغالين ومحرومين
يا مسلسلين رجلين وراس
خلاص خلاص
ما لكوش خلاص
غير بالبنادق والرصاص
دا منطق العصر السعيد
عصر الزنوج والأمريكان
الكلمه للنار والحديد
والعدل أخرس أو جبان
صرخة جيفار يا عبيد
في أي موطن أو مكان
ما فيش بديل
ما فيش مناص
يا تجهزوا جيش الخلاص
يا تقولوا ع العالم خلاص "

― أحمد فؤاد نجم , أحمد فؤاد نجم: الأعمال الشعرية الكاملة

11 " كل عين تعشق حليوة وإنتِ حلوة ف كل عين
يا حبيبتي قلبي عاشق واســــمحي لي بكلمتين
كلمتين يا مصر يمكن هما آخر كلمتين
حد ضامن
يمشي آمن
أو مآمن يمشي فين ؟ "

― أحمد فؤاد نجم , أحمد فؤاد نجم: الأعمال الشعرية الكاملة

12 " مصر يا مه يا سفينه
مهما كان البحر عاتي
فلاحينك ملاحينك
يزعقوا للريح يواتي
اللي ع الدفه صنايعي
واللي ع المجداف زناتي
واللي فوق الصاري كاشف
كل ماضي وكل آتي
عقدتين والتالته تابته
تركبي الموجه العفيه
توصلي برالسلامة "

― أحمد فؤاد نجم , أحمد فؤاد نجم: الأعمال الشعرية الكاملة

13 " ما دامت مصر ولاده
وفيها الطلق والعاده
حتفضل شمسها طالعه
برغم القلعه
الزنازين "

― أحمد فؤاد نجم , أحمد فؤاد نجم: الأعمال الشعرية الكاملة

14 " ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام
وكل يوم في حبك تزيد الممنوعات
وكل يوم بحبك اكتر من اللى فات "

― أحمد فؤاد نجم , أحمد فؤاد نجم: الأعمال الشعرية الكاملة

15 " جرح النفس له وجعين ...يبكي القلب قبل العين . "

― أحمد فؤاد نجم , أحمد فؤاد نجم: الأعمال الشعرية الكاملة

16 " حتقول لي الفقرا ومشاكلهم
دي مسائل عايزة التفانين .
وأنا رأيي نحلها رباني
ونموت كل الجعانين . "

― أحمد فؤاد نجم , أحمد فؤاد نجم: الأعمال الشعرية الكاملة

17 " ويا مصر يا أول صوره

فى عيون المولودين

يا مصر يا آخر صوره

فى قلوب الميتين

يا بلدنا

يا بكره ولادنا

يام الدنيا والدين

يام الولدات المجدع

والبنتات الطعمين

يحرم اسمك علينا

ونعيش متغربين

لو سبنا الذل يدوسك

أو عشنا مغلوبين


القاهره 1967 "

― أحمد فؤاد نجم , أحمد فؤاد نجم: الأعمال الشعرية الكاملة

18 " سكات .. سكات .. سكات
لكن لسكاتنا معنى .. أنطق من الكلام "

― أحمد فؤاد نجم , أحمد فؤاد نجم: الأعمال الشعرية الكاملة

19 " الأوله آه
والتانيه آه
والتالته آه
***
الأوله آه
والغدر لَمَّن حكم
صبح الأمان بقشيش
والتانيه آه
والندل لما احتكم
يقدر ولا يعفيش
والتالته آه
والحر مهما انحكم
للندل ما يوطيش
الأوله غربتي
والتانيه بلوتي
والتالته كلمتي "

― أحمد فؤاد نجم , أحمد فؤاد نجم: الأعمال الشعرية الكاملة

20 " دار الفلك
فى مغزلك
طول السنين
ما أمهلك
ياناسج الروح
ف الحياة
الحب لك
والخلد لك
انت الازل
وانت الابد
والهالك
اللى يجهلك
يا شعب
يا نبض الوجود
الحكم لك
والملك لك . الملك لك . الملك لك "

― أحمد فؤاد نجم , أحمد فؤاد نجم: الأعمال الشعرية الكاملة