" الأيام
*****
أيام.. ورا أيام.. ورا أيام
لا الجرح يهدا.. ولا الرجا بينام
ماشى ف طريج الشوج.. لكن جلبى
مطرح ما يمشى يبدر الأحلام
*********
العتمة سور .. والنور بيتوارى
وايش للفَجَارى فى زمان النوح؟
ميتى تخطّى السور يا نوارة...
ويهل عطرك ع الخلا.. ويفوح؟!
ويشدنا لقدام..
أيام.. ورا أيام.. ورا أيام
****
من عتمة الليل.. والنهار راجع
ومهما طال الليل بييجى نهار
مهما تكون فيه عتمة ومواجع
العتمة سور.. ييجى النهار تنهار
وضهرنا ينْجام
أيام.. ورا أيام.. ورا أيام "
― سيد حجاب , مختارات من شعر سيد حجاب