QUOTE : تفرانيل 100<br /><br />انا شعرى غامق<br />بس قلبى مطقطق ابيض من زمان<br />جايز عشان<br />الناس ساعات بتلاقى ناس<br />تعرف تشوفها بجد<br />و انا قلبى لسه عمره ما اتكشف علي حد<br />بقابل اد ما اقابل<br />و افارق اد ما افارق<br />و ما اتعلمش<br />بلخبط ف الاسامى عشان<br />بخاف انسى<br />بلخبط ف الدنيا عشان<br />بخاف لا ما اعيشش<br />بقالى كتير ما بتكلمش<br />بخاف يبقى الكلام متعاد<br />ما كملتش ف اى رحيل<br />ما كملتش ف اى قعاد<br />و بدى للحياة بالكاد<br />ما يكفيها<br />و يكفينى<br />شرور البهدلة فيها<br />مليش ف البنت طلبات غير<br />تنسينى اللى قبليها<br />و بدخل ف حاجات تخاطيف<br />و عينى ع اللى بعديها<br />رقصت كتير علي السلم<br />بخاف اطلع<br />و اخاف من الارض<br /> اكيد الخوف مش الفكرة_<br />و حتى يا ستى يعنى بفرض<br />اكيد الخوف مهواش عيب<br />طبيعى الناس تخاف من الغيب<br />و من المقدور<br />برغم كدة<br />بحب الضلمة اكتر ما بحب النور<br />ساعات بتمنى شقة ف برج شايفة النيل<br />و اوقات انى اعيش مستور<br />و بزهد .. ف كل ما ف الرحلة من زخرف<br />و ما زهدهاش<br />ما دام فيها رمق يتعاش<br />اكيد ف الرحلة يوم متحاش<br />و مستنى اعدى عليه<br />و تعرف عنه اصلا اية ؟_<br />مفيش غير انه لسه مجاش<br />بنام ؟<br />طبعا .. كتير جدا<br />و بالايام<br />و طول الوقت بحلم ان انا بجرى<br />و بشبع من الحاجات بدرى<br />و رغم كدة لسه ما شبعتش<br />من الجرى و من الاحلام<br />بخاف من الموت<br />عشان خايف ساعتها اكون<br />عبيط .. كل اللى سيبته كلام<br />بشوف افلام<br />عن الدنيا<br />و عن حكايات<br />لناس عاشت حاجات تانية<br />و عن حكايات لناس ماعاشوش<br />و بتأثر<br />و بتحسر<br />ع كل اللى كان ممكن<br />اكونه<br />بس ما بقيتهوش