QUOTE : Ode 4.7<br /><br />Diffugere niues, redeunt iam gramina campis<br /> arboribus comae;<br />mutat terra uices et decrescentia ripas<br /> flumina praetereunt;<br />Gratia cum Nymphis geminisque sororibus audet <br /> ducere nuda chorus.<br />Inmortalia ne speres, monet annus et almum<br /> quae rapit hora diem.<br />Frigora mitescunt Zephyris, uer proterit aestas,<br /> interitura simul <br />pomifer autumnus fruges effuderit, et mox<br /> bruma recurrit iners.<br />Damna tamen celeres reparant caelestia lunae:<br /> non ubi decidimus<br />quo pater Aeneas, quo diues Tullus et Ancus, <br /> puluis et umbra sumus.<br />Quis scit an adiciant hodiernae crastina summae<br /> tempora di superi?<br />Cuncta manus auidas fugient heredis, amico<br /> quae dederis animo. <br />Cum semel occideris et de te splendida Minos<br /> fecerit arbitria,<br />non, Torquate, genus, non te facundia, non te<br /> restituet pietas;<br />infernis neque enim tenebris Diana pudicum <br /> liberat Hippolytum,<br />nec Lethaea ualet Theseus abrumpere caro<br /> uincula Pirithoo.